زماااااااان البنت تغسِّل الهدوم، وُ تظِّهِّر جلاليب أبوها،

صورة ارشيفية

منوعات

زماااااااان البنت تغسِّل الهدوم، وُ تظِّهِّر جلاليب أبوها، وزمان التوب بِشُرَّنُو متيٰن كل واحدة تمسك طرف والتانيه تمسك طرف لمَّن يِنشَف، والجلاليب والعراريق يِشُرُّوهِن في زريبة الشوك
ويِكوُهِن بمكوة الفحم أُم ديك.
وُ باقي الفحم يعملوا بيهو ملاح الغداء، وُ تكشح موية الغسيل في البيت عشان الرملة الحمراء تثبت.
وُ تقوم تقطع البصل وتحمِّرو وتعمل ملاح الغداء.. وأُمَّها تقول ليها أنا خلاص بَعُوس ليكم الكِسرَه، إنتي تِعِبتِي أُخدِي ليك راحة يا بنتي.
وُ بعد تتغدَّىٰ.. البِتْ تقوم تَكرُش سِفِنجَتَا.. أبو حمامة.. والقمر بوبا.. بىٰ طوبه سوداء بيسموها.. الكرَّاشَة..
والسِفِنجَة غالباً بتكون مقاس ٩ وُ نُص.. طبعاً السفنجة دي كانت آخر صيحة في الزمن داك.
وُ في نوع من البنات أَبوهِن بعمل ليهن كركاسة بىٰ وَرَاء.. قطعة أنبوبة لَستِك بِخَيِّطها عليها.. علشان السفنجة ما تِنْسَهِكْ..
وبعدها البِتْ تطلع العَصْرِيَّات عَلىٰ ناس الفريق مِتحَشِّمَه وُ لابْسَه توٰبا وُ مِدَهِّنَه ضفاير شَعَرَا بىٰ دِهِن الكَركَار.
يا سلاااام بِت حافظَا شَرَفَا.. يشهد الله كان عايَنتَ فيها تَدَنقِر إستحياءً منها.. وُ ما بتقدر تملأ عينك فيها.. وُ بتفارِق ليها الشارع كمان.
وُ بعد تَجِي من العَصرِيَّات تقعُد تنَضِّف قزازة اللمبة بالرماد.. الهَبُّوُد.. وُ تملاها بالجاز.. الكيروسين.. وُ ترَكِّب ليها الشريط وُ تَوَلِّعَا.. من المغرب بيٰتَا مُمَيَّز وُ نضيييف.
وُ ناس سمحين وطيبين وُ يِطَلِّعُوا العناقريب والهبَّابَات في نُص الحوش.. وُ يِحَلبُو لَبَنهُم من غِنيٰمَاتُم في الزَرِيبَه.. وُ يِسَوُّوُ شاي المغربيه المَقَنَن بالزنجبيل.
وُ مَع طِلُوع القَمرَا يِقعُدُوا يِتحَجَّو بىٰ فاطنه السَمحَه والغُول والبعاتي.. زمن والله.. ياااااا حليلو.. كانت وقتها النفوس طيبه ونظيفه زي لبن الإبِل.

منقول متداول