الطيب كنونة : يكتب حكايتي مع حبوبة

بقلم : الطيب كنونة

زمااان،كنت بمشي مع حبوبتي_الله يرحمها ويغفر ليها_سوق السجانة عشان تجيب الخدار واللحم والزيت وباقي الحاجات،اها الزنك كبير،مقسوم علي اتنين،وشرق منو مكتب العوائد، وغرب منو قهوة عم مبروك، والفاصل بينهم شارع صغير،عم مبروك زول مشهور ومعروف،ببيع الشاي باللبن المظبوط وكمان قريبة منو حاجة ميمونة ( صاحبه امي زينب بت مصري الألفي) ماشاء الله عندها زلابية في طشت كبير، والعمال كل واحد شايل كباية الشاي الشب،وصحن فيه زلابية( لقيمات)لزوم السندة من الصباح،استرعي انتباهي انو الرواد بناقشوا في موضوع حاااار،غفلت حبوبتي وجريت عليهم، اها لقيت بناقشوا في موضوع وواحد منهم شايل جريدة بقرا منها،الكلام ما وقع لي،لكن عجبني نضمي الزول الشايل الجريدة،ماكملت بقيه التصنت،يجيني واحد يجرني من يدي وياشر لي لمكان حبوبتي،اها جريت شلت من حبوبه قزارة الزيت،وهي شالت القفة،ونحنا مارين وسط السوق،حبوبتي تسالم علي ناس كتار،ولمن وصلنا دكان مصلح اليماني،دس لي حلاوة لكوم في يدي،فرحت وسعدت كتيير ،ونحنا راجعين علي البيت وشاقين السوق ،عيني لسه في قهوة عم مبروك ولمة العمال، وكالعادة بنجي مارين بمحطه سيد،( السجانه بالنص )ونمشي شرق،شاقين ميدان العلمين، اليوم داك مشينا، بجنب بيت ناس يحي اليماني ،واشوف ليك عربات البلدية ترش في الميدان،وناس اخرين شايلين كراسي وترابيز بنزلوها من لوري عم عباس والشمار كاتلني شديد،وقريب من طابونة بحيري،حبوبتي لقت نسوان كتار ،جايين للرغيف الماخمج وقامت حبوبتي نضمت معاهم بعد السلام و الاطمئنان علي العيال، وقالت ليهم في ندوة المغريب في الميدان دا في ناس كتار بتكلموا فيها عن حقوق المرأة وازاله الامية وحق التعليم والعلاج والسكن ويخشوا البرلمان مع الرجال،وانا راخي اضاني للنضمي ،وبالي كمان هناك مع عربية الرش،والشفع الجارية وراها.والناس الشغالة بهمة عشان الندوة واشوف كمان الزوله الكانت حبوبتي تتكلم عنها وهي عضو في البرلمان ،وأهم مافي كلام حبوبة انو النسوان يجوا بدري ويكلموا الجيران والحبان معاهم شان يحضروا الندوة، وكمان كل واحده تجيب معاها قدر المستطاع كان تمر ولاحلاوة ولا تسالي عشان الضيوف.اها بكره 8/مارس اليوم العالمي للمرأة،وقالوا في لمة كبيرة في وسط الخرطوم عشان يقدموا مذكرة عن حال البلد.
#ابقو_كتار