طالب طب و حامل ماجستير آداب يبدع في رثاء النعام آدم
طالب طب و حامل ماجستير آداب
يبدع في رثاء النعام آدم
منوعات / سودان سوا
قصيدة
أنا بسمعك
رثاء المبدع الراحل المقيم النعام آدم
أنا بسمعك لمان يدق صوت الدليب
جوايّ تدق تمرة قليب
شايلك دوام ما ضيعك
أنا بسمعك ما أروعك
يا عضم ضهر الغنا وبحر الغناوي الخالدة يا أبونا النعام
تنسلا زي خيت الشمش تغسل وجوه مدن الظلام
تنْسدَّطاقة الهم تعوم الدنيا في بحر السلام
تشرب ينابيع الهنا من منبعك
أنا بسمعك
غيمك رزم بلع الهجير وانشر نور
شتت عطور الخير و صفق للسرور
شايل بشارات مطلعك
أنا بسمعك
ضنَّ القدر يوم صنَّ ختفك يا ملك
مجروح يئن باكي الشِعر
واتيتمت دارة مهيرة أم السِحر
مات الشتم بعدك هِلك
يبْست حلوق الأغنيات وانكسر مِرْق الِسلك
كيفن يرن و قليبو فارق أصبعك
أنا بسمعك ما أبدعك
بيناتنا حي ما مُتَّ و الزول الوسيم راجيك يحن
حلمك عليّ يا هو المقدر ديمة في إضنيّ تدن
ساقة غناك قادوسة ساكب لينا مِن
عسل الغناوي المنو نروى ونستريح في مرتعك
أنا بسمعك ما أرفعك
سامي و تضارع في شموخك مروي و آثارنا و قمرنا
طامي يا نيل الخلود منك شرب ريان تمرنا
هامي يا مطر الخريف الصبَّ يروي محل شدرنا
يا حامي درقة شايق الموسوم حضارات في صدرنا
رامي يالضل الرهين فارقتنا وحر الفراق نجضّ صَبُرنا
رضرض عضام الفرحة فينا ومزق أرواحنا و عُمُرنا
وقطَّع أوصال النغم يوم ودعك
أنا بسمعك
يا الكنت زغـرودة الجميع في الفرحة و الفال السمح
كنت الندى الرَّطب حليقات الخدار نديان صِبِح
ياكا النخيل جارو الحراز وانت السنط قالد الطلح
كنت المسور نيلنا الجسور ياكا المريق وأخو القمح
إنت الشمال بي عزتو وناسو الحُنان الصح و صح
إلا مـا شاورتنا و فارقتنـا وفي ذاتنا عمقت الجرح
وانهدَّ ركنن كان منيع في موقعك
أنا بسمعك ما ألمعك
رغم الرحيل بُعْد المسافة واستلابات الزمان
جوانا كامن في أمان
جوه النفوس منحوت معتق ذكرتك في كل لسان
كلما طلت شمش أو لامس أوتارنا البنان
ضو النجوم يا هو النعام طمبورو عطَّر كل مكان
سائل المولى القدير دعواتنا ليك تغشاك في عالي الجنان
تلقاك مع الحور في النعيم متهني في الخير و الأمان
والرحمة ليك تبقى المهاد
والمغفرة التوب و الوساد
ومليون سلام و أضعافو رحمة و ابتهال راشعات دوام في موضعك
أنا بسمعك
سرالختم تاج السر
أمبدة…الثلاثاء 11 / 5 / 1993 م