النازحة صباح أحمد والتكتك والبيت المسكون
#يوميات صحفية نازحة / صباح أحمد
حكيت ليكم بنفتش لي بيت للايجار صاح؟!
اها أمس العصر اتصل علي السمسار وقال لي في بيت نضيف وبي سعر معقول في( …)
قلت ليه خلاص نجي نشوفه قال لي اطلعي طوالي لانو في ناس غيركم حيجوا يشوفوه برضو..حاولوا اسبقوه.
دخلت في عبايتي عبد الواحد السوداء بي البيجي ديك ولفحت طرحتي وقلت لعلي ولدي _أررح يا ولد ابقي مارق.
(2)
ركبنا المواصلات نزلنا في المحطة واتصلنا عليه ..قال تعالوا خاشين بي الشارع جوة ..مشوار من الظلط علي قال لي البيت دة ما بينفع معانا بعيد من الظلط والمدرسة قلت ليه خلينا نشوفه أول وفي سري قلت لو لقيناه نضيف وسيده نزل لينا في السعر شوية ممكن نتغاضي عن قصة بعده من الظلط..
وصلنا حسب الوصف..لقيناه معاه سمسار تاني ..قال نشوف سيد البيت .جاء سلّم علينا وسألنا انتوا من وين أصلا .وزوجك وين .وكم نفر .جاوبته قال خير ..اها نشوف البيت طيب قال قبل نشوفه في حاجة لازم اكلمك بيها قلت ح يقول لي نكتب ورقة أو نوقع عقد أو يجي زوجك حتي تأجروا البيت قلت ليه خير!
قال لي خير ..
من شكلك ظاهر عليك صالحة ونيتك بيضاء..عشان كدة قلت أوريك..
_توريني شنو؟!
•البيت نضيف وكويس بس اكون صريح معاك عندي بتي بتشوف حاجة
انا:
بتشوف حاجة كيف يعني؟!
•بتقول بتشوف زول بس نحنا والله ماشفناه..ولا قاعدين نشوفه.
تقول لينا هدا واقف جنبكم ما بنشوفه لا انا لا امها لا اخوانها
انا وعلي ولدي
انا:
قصدك البيت مسكون يعني؟!
•مابتقدري تقولي مسكون لكن البت قالت بتشوف حاجة.
كيف مابقدر أقول ؟!
بسم الله الرحمن الرحيم .معناها مسكون !
بري بري دة م بنفع معانا نحنا بلا بيت مسكون الله يسترنا ويحفظنا
(3)
السمسارين بقي دة يعاين لي دة والراجل بيكلم فيني خشمهم ماقدروا يفتحوه..وكان واضح انهم أول مرة يسمعوا الكلام دة ..
الزول الجابنا قال ليه دي مشكلة طبعا وما بنقدر ناجره لي زول يدخلنا في مشكلة كمان .
خليتهم بتناقشوا وطوالي مسكت يد علي ومشينا ونحنا بنتلفت زي مروحة التربيزة.
السمسار جاء لاحقنا وقبل اتكلم معاه اتصلوا عليه الناس التانيين
وين انتوا ؟!
في بداية الشارع.
خلاص جاي عليكم
قلت ليه ما صاح منك تأجر ليهم البيت دة ولا في داعي تخليهم يجوا يشوفوه زاتو.. وسيد البيت زاتو مفروض يكون واضح معاكم كمان ..ورجع ورجع ورجغ .نق نق نق
(4)
وصلنا لقيناهم مرتين..واحدة كبيرة والتانية شتلة صغيرة .انا من بعيد شغالة انطط ليهم في عيوني عشان يعرفوا في حاجة خطيرة ..بس واضح إنهم ولانو عيوني صغار ما شايفيني منططاها ليهم زاتو..
وقبل يتكلم معاهم طوالي وريتهم القصة وقلت ليهم احسن تشوفوا بيت غيره ..قلت للسمسار رقمي عندك لو لقيت بيت وريني بس أول أتأكد مايكون البيت مسكون ولا حاجة..
(5)
وصلنا الظلط قلت لي علي خلينا نشيل معانا طعمية وعيش لاخوانك ..شلناهم قبل نتحرك سالت الولد البعمل الطعمية ماعارف ليك بيت فاضي للايجار عليك الله يا ولدي
.نط عمك كبير كدة سايق ليه تكتك ملان قش بهائم وشولات اظن فيها حطب واقف جنبهم..
•والله انتي زولة الظاهر عليك نيتك بيضاء.
(بي سري):
تاااني صالحة ونيتي بيضاء؟!
😅😅
•والله قبل شوية اتصل علي زول بعرفه قال عنده بيت للايجار
_ووين البيت ومواصفاته شنو
في (….) ..تاني بيت من الظلط ..
وصف لينا مكانه..
•ممكن تركبوا المواصلات ونتقابل جنبه أو لو بتركبوا معاي نوديكم تشوفوه هسة ..
_مافي مشكلة .نركب معاك .
حاولت اركب في التكتك وراء غلبني اطلع ..قال لي تعالي اركبي جنبي قدام .
_الخوف أقع يا عمو.
•مابتقعي يا بتي.
اديت علي موبايلي وهو ركب فوق القش والشولات بي وراء وانا ركبت جنبه..
واول ما ركبنا والتكتك اتحرك بينا نسيت خوفي وبديت احكي ليه عن قصة البيت المسكون ..وحكيت ليك كيف كنا عاوزين نركب المواصلات ونرجع البيت .بس غيرنا راينا وقلنا نشيل طعمية وسبحان الله سألنا الولد عن بيت للايجار وانت سمعتنا ..
وحكيت ليه قصة حياتي عدييل
وصلنا البيت شفناه لقيناه تعبان شديد ولسة فيه تصليح وحوشه صغير قلنا ليه دة ما بينفع معانا ..
خير
خير
ركبنا المواصلات جينا البيت ..حكينا للجماعة القصة وزدنا عليها شوية بُهارات لزوم السبكة..
قبل شوية بفتش في موبايلي لقيت علي مصورني فيديو اثناء ما راكبين في التكتك أمس ..
ضحكت شديد لمن شفت الفيديو واتذكرت الموضوع وقلت والله إلا احكي ليكم القصة