محمد طلب يكتب : *(حركة) و الحركات.. (الورطة) و الوردة*
العنوان (عجيب مرة ) و لا يخلو من الغرابة و(الحركات) الغريبة العجيبة و في السودان يقولون (كل حركة معاها بركة) رغم انه في الواقع كل (حركة ) في حياة اهل السودان معها (بلاوي متلتلة) و(الحركة) تلد (الحركات) والحركات تنفصل منها (حركات) وهناك جملة متداولة لا علم لي بمدلولاتها لكن لها إنعكاسات واضحة في الواقع المعاش الان والجملة هي (حركات جيش) و (قاف دال سين) المتمردة علي (الجيش) اليوم كانت بالامس من رحم ذات الجيش كما كان يقول قادة (الجيش) بألسنتهم
و(الحركات المسلحة) بتاعين (الحركات المصلحة) المحاربة مع (الجيش) الان بالامس كان نفس (الجيش) قد خلق لها (حركة) لتحارب تمردها فهل كانت حركة (قاف دال سين) مجرد (حركة في شكل وردة) ؟؟؟ لا ادري !!!..
والله حيرتونا بي (حركاتكم دي) يا ناس (لا لا) و مرات (بل بس ) و كله (لت و عجن) ثم (الجقم ) ….
(حركاتكم دي) منعتنا و منعتكمز الحركة زاااتو…. وبصراحة (الحركات دي ) ما بتنفع معانا (لا دي ولا ديك) في النهاية دي كلها (حركات سااااي ) إلا ان الذي احتاج لمعرفته هو (حركات جيش) والاخري (حركة في شكل وردة) ….
الاولي لم أعرفها إلا في هذه الحرب العبثية و ما زلنا في انتظار (حركة شكل وردة) …
عموماً (دا ما موضوعنا)
العنوان قصدنا به الفنان الراحل عبد العظيم عبد الله ابن شرق السودان والمعروف ب (عبد العظيم حركة) رحمه الله فهو رجل لطيف وظريف فنان خفيف الحركة وراقص مع خفة دم مما جعلهم يطلقون عليه لقب (حركة) و يُقال ان من أطلق عليه هذا اللقب وزير (مدني) سابق وهرم إعلامي هو محمد خوجلي صالحين فقد كان عبد العظيم لاعب كرة ممتاز يجيد المراوغة وعندما راه صالحين مع فريق التحرير (إستاك) سابقاً اطلق عليه هذا اللقب … (بالله استاك والتحرير دي مش دايرة ليها وقفة)
دعها الان فموضوعنا محور المقال أغنيتين للفنان عبد العظيم حركة الأولي هي اغنية :-
*قلبي ما بعرف يعادي*
وهي من اشعار عبد الوهاب هلاوي ..
والثانية هي اغنية:-
*عشان خاطرنا ترجع*
من اشعار وتلحين احمد حميد
و كلاهما من الاغنيات الجميلة الراقصة ذات الحركة عند المرحوم (حركة)
كلا الاغنيتين تُعبر عن حالة (حب) نعود لها تفصيلاً واسقاطاً علي حالات بعينها في مقالات قادمة …
بشكل عام نجد ان اغنية *(قلبي مابعرف يعادي )* تعبر بشكل جلي عن (الحب المطلق) ويمكن تأويلها علي انها صرخة قلب متعب من التضحيات بدون مقابل…
اما الاغنية الثانية فهي :-
*عشان خاطرنا ترجع* وهي نص يحمل تكرار النداء و الرجاء (بالعودة)…
و بشكل عام الأغنية تعكس حالة عاشق يري أنه لا (خلاص) البتة إلا (بعودة) الحبيب … مع ان اسباب الفرقة او البعد غير واضحة في النص..
عزيزي القارئ الكريم اعدك بالعودة بالتفصيل للأغنيتين في المقالات القادمة وعد حقيقي وليس وعد (بتاع حركات)
ونتركك الأن لتأمل النص الأول الذي لا شك عندي أنك سوف تسقطه علي الحالة الراهنة و(الحركات) اياً كانت (حركات جيش) او (حركة في شكل ورطة) عفواً اقصد ( حركة فب شكل وردة) ..
فإلي نص الاغنية:-
*قلبي ما بيعرف يعادي*
*قلبي ما بيعرف يعادي*
*أصلو ما بقدر يعادي*
*مهما يبدأ القسوه قلبك تلقا بي الحنيه بادي*
*أصلو مابعرف يعادي*
*كل زول يظلمنا ياما*
*نشيل عذاب ظلمو ابتسامة*
*لو نفكر بس نلومو نلقي ماحلوه الملامة*
*قلبي شمعه الريح طفاها شفتا ليك شمعه بتعادي*
*إنت رجع لي رسائلي والرسائل العندي شيلا* *والصور لو قلتا برضو وكل ذكره ريد جميلة*
*العلي سويتو غايتو لي رضاك ماسبتا حيلة*
*كل ليل انا شايلو دمعة عايشو ليلة بألف ليلة*
*و قلبي راضي بظلمك إنت بس أريتك تحيا راضي*
وختاماً فليحيا الوطن وشعوبه راضياً بعد كل هذه العذابات…
سلام
محمد طلب