الحياة مهنتي:الطيب كنونة :الضرا_4

الحياة مهنتي:الطيب كنونة :الضرا_4
حبوبتي الله يرحمها ويغفر ليها بتحب النظام في كل شئ وحتي عدتها حقت الإفطار عامله ليها وسم معروف بين الجيران.اها القعده في الضرا برضو عندها ترتيبات ،الناس الكبار في النص،لزوم التقدير والاحترام، والونسه ليها منظم،عم عبدالله (الله يرحمه ويغفر له)في اغلب الاحيان هو المنظم،باعتباره الكبير ، والقديم في شارعنا يتوسط القعده ويوزع النقاش حسب الموضوع بانضباط تام، ونحنا ناس قريعتي راحت،محلنا ورا الصف، لزوم الغسيل للكبار، وجر الصواني للخلف قدر المستطاع شان الصلاه الجماعيه وقبلها كواجب تجهيز الاباريق، مرات بنخرمج شويه دون قصد، لكن الرقابه بترصد كل التحركات لزوم التوجيه في صمت دون احراج. صينيه حبوبتي مميزه دائما بتنوع المشروبات البارده، والساخنه وايضا الماكولات ، شئ تاني مهم الحاجات المتفرده زي الكركدي ،والبليله، والليمون والقنقليس والقضيم، ومرات التبش والشطه الحااااره والشرموط الناشف بتجينا من اهلنا الكردافه،اوحاجات من خالاتي المقيمات في سنجه عبدالله او كركوج او مدني وكمان من قضارف الخير ،اماالمنقه والبرتقال ، وقصب السكر بالربط، والويكه بأنواعها ومسمياتها المختلفه قبل رمضان بشويه،يا رسلوها لينا بالقطر او اللواري اوجابوها معاهم.اهلنا كانوا بجوا الخرتوم( زي مابتقول حبوبتي)لحاجات معينه ياماشين الحج او جايين للعلاج ودي نادره جدا لان العلاج متوفر ومجانا في كل معظم مستشفيات السودان ودي مسئوليه الدوله،اولزياره جنينه الحيوانات لزوم الفرجه.اويكون واحد من الابناء تم قبوله في جامعه الخرطوم( طبعا تذاكر السفر بالسكه حديد او البواخر للطلاب بتدفعها الحكومه مجانا،ذهابا وايابا.) اماجنينه الحيوانات(حديقه الحيوان (Zoo)،وهي مشهوره عالميا إذ يحضر لها السواح من مناطق عديده من العالم،و زيها الغايه المشهوره قريب من محطه السكه والتي تعتبر من المحميات الطبيعه المعروفه عالميا في رحله الطيور المهاجره من بلاد بعيده ترتاح هنا في الغابه ثم تعبر لغرب افريقيا وكمان الحزام الاخضر جنوب الخرطوم والذي زرع منذ عشرات السنين لحمايه الخرطوم من الاتربه وتلطيف الجو، راحت كلها بفعل فاعل. و تاريخ كثيييير راح..منو الباع ولا منو الاشتري، دا موضوع تاني. الونسه في الضرا مرات بتاخد مواضيع بخلاف المتعارف عليها زي الكلام القلتو والمعلومات الهامه ، اما ساس ويسوس مساحتها ماكبيره، وبالذات لمن يكون فاطر معانا عم باب الله( الاعلاميوالرياضي الشعبي)الملقب بسيك..كع..ودا موضوع تاني..مريخابي علي السكين ووطني لحد الثماله، ولنا معه حكايات ، وقصص، و طرائف، وقد تناولت جزء منها في كتابي السابق( محمد كنونه بعض الوعي من كل يأتي) والنقاش يتسع ويزداد حلاوه لمن تبدا فناجيل القهوه تتلاقط وكبابي الشاي تتحرك من صينيه لاخري…ناس الكيف..وناس المراجعات بعد الصلاه،ونحنا عيونا مفتوحه علي بعض الصواني البتكون فيها الفته بالرز..ودا يوم تاريخي…اها بالنا مرات مع عمنا حاج عباس الشايقي، و صينيته المشهوره بالقراصه ام بخارا يلوي…صاحبنا (دقل) اختصاصي بحث في الصواني العامره بالخيرات. وخبير استراتيجي في النظر علي المختفي فيها، مرات برشدنا قبل مدفع الإفطارومرات بعمل رايح)…نعم مدفع عدييل واحد بضرب من تمنه جنوب قصاد ميدان الليق( تمنه يعني مركز الشرطه) او بتاع القصر الجمهوري ودا موجه لناس توتي وبحري وام درمان،والخبير دا يرشدنا عبر اشارات متوافق عليها عندو حاسه شم قويه، قوه خارقه زي قوه فلان داك بخاف اجيب اسمو،شان الهوا مايقسمو، وعينك تشوف كل النور،كل خيرات السودان في الضرا بالكتير والوفير، وهنالك تنافس في إخراجها ، وتنوعها، من قبل الجيران.و بعد صلاه المغرب تبدا معركه فرز الصواني، ومحتوياتها، من صحون، ومعالق، وطباقه ، أشكال والوان ، وتنافس في الانتاج،وانا اعاين واراقب متين ينتهي النقاش المعلوماتي ،شان القي لي كلمه ولا كلمتين لزوم القشره في المدرسه مع صحباني قبال اولاد البيه مايسبقوني…اها نتم الباقي قدام..ابقوا حاضرين ما غايبين باذن الله تعالى .
#زي السودان مافي بتعدد اعراقه ، وثقافاته.وحتي تنوع الماكولات فيه.ودا دلاله علي التنوع والترابط والتداخل الاسري.
#الحاصل ماشبهنا، ولا مننا.
#في الشهر الفضيل نزيد من دعمنا لمشاريع الشباب الهادفه بالتوعيه المجتمعيه، باثار الراهن، ومراراته، وجراحاته الاليمه.
#ندعم غرف الطوارئ، والتكايا العامرات بالخيرات والبركات، وايضا المشافئ والمطابخ، ونتفقد الأسرالمتعففه في صمت نبيل.
#نبذ كل مايفرقنا ويبث فينا خطابات وتوجهات الكراهيه، والعنصريه، البغيضة.
#عزنا وفخرنا وتنوعنا أمانه لاجيال قادمة.
#باكر نبنيك ياوطن الجساره والتاربخ التليد، كما نهوي ونريد، موحدا.وليس ذلك ببعيد
#غدا_تخضر_الأرض_اليباب.
الطيب كنونة