نحن بلدنا بخيراتا.. دي البلد البتشبها.. ياتا..؟! بقلم علي جعفر،،،

راي : سودان سوا

يا دكتور.. انت بتنفخ في قربة مقدودة..*
*السودان ده انتهى خلاص.. ياخي كيس السلطة بقى بخمسة ألف جنيه.. ربع مرتبك..*
*اتخارج يا زول تعال السعودية..*
*والله أقل واحد في الدفعة بيصرف ١٥ ألف ريال..*
*ومرتاح وساكن..*
*وأمورو باسطة..*
*وانت شابكنا.. حمدوك.. والتغيير.. والفساد..*
*والله خمسين سنة لقدام.. البلد دي ما تنعدل..*

*للأسف.. النظرة.. للسودان.. الوطن..*
*أصبحت لا تتجاوز.. مفهموم.. الدخل والمنصرف..*
*والوطنية بقت في الجيب..*
*طيب يا جماعة البلد دي.. حنبنيها كيف..؟؟!*
*ولّا نهاجر نحن.. ويهاجروا أطفالنا وأسرنا..*
*هجرة أسر كاملة..*
*وتجدع الجنسية في أقرب زُقاق..*
*وتحمل ليك أي هوية بالتجنس..*
*وتقنع بكامل اهلك..*
*وتتخارج..*

*المستقبل.. للأجيال..*
*أطفال المدارس..*
*شباب الجامعات..*
*ديل هم الهسا في الشارع..*
*مطالبين.. بتوضيح الرؤية.. للمستقبل..*
*الضوء في اخر النفق انطفأ..*
*والعتمة كتمت..*

*الهجرة.. أصبحت أحد الحلول..*
*وحل مشروع..*
*فأرض الله واسعة..*
*لكن البهاجر بدون أسرتو وأطفالو..*
*بيدفع التمن غالي..*
*حنان الأم. وطلتا..*
*دعوات الحبوبات..*
*حاجة عاشة.. وحاجة فاطنة..*
*وحاجة سكينة..*
*لحظات قليلة.. في اليوم يا مغترب.. مع أطفالك.. بالدنيا..*
*كان فطروا نبق..*
*واتغدو.. لالوب..*
*لالوووب بلدنا.. ولا تمر المدينة..*

*سودانا جميييل..*
*جمال النيييل..*

*الهاجر هاجر.. والماهاجر.. حالف ما يخلي ليهم البلد..*
*دي بلدنا..*
*بلد الخير والطيبة..*
*أرض خزاين.. فيها جناين..*
*نجوم وعيون للخير بتعاين..*

*وحنبنيهو.. النحلم بيهو يوماتي..*
*سنعبر وننتصر..*
*فليفسح الاسلاميون المجال بكل طيب خاطر..*
*لأنو السودان جمييل..*
*ودماء الشباب غالية..*
*مافي مسلم برضى يحمل شبهة دم ساي..*
*يوم القيامة..*
*خلاص.. كفاكم..*
*أدّوا غيركم الفرصة.. يقود البلد..*
*حكمتوها ثلاثين عام..*
*ولم تعبروا بها.. ولم تنتصروا..*
*عبرت مصالح كوادرهم الفاسدة..*
*وبقي النزهاء منهم.. يراقبون المشهد..*
*ورحم الله الصادقين منهم حين قالوا..*
*يا اخوانا.. نحن ولاد مزارعية..*
*كان شفتونا بنينا العمارات..*
*وركبنا العربات..*
*اعرفوا.. نحن فسدنا..*

*من حق الشباب.. أن يحلم بوطن المؤسسات والقانون..*
*وسيبكي المُرجفون في المدينة من يصفوا الباحثين عن التغيير..*
*وعن طموحاتهم..*
*وأحلامهم..*
*بشباب الخرشة..*
*وأنهم يتعاطون المخدرات..*
*تعاطي الحشيش.. يا هؤلاء أهون من تعاطي المال العام..*
*وأهون عند الله من أكل مال اليتيم..*
*ونهب حقوق الضعفاء والأطفال..*

*الحصة وطن..*
*والخير لا بُد أن ينتصر..*
*و”لأغلبن أنا ورسلي”..*
*كتبها الله لكل من يمشي في درب الحق والعدالة..*
*فهنيئاً لمن سلك درب الحق.. والزود عن المصالح العامة..*
*وتعس.. عبد الدينار..*
*وتعس عبد الأجندة الحزبية..*
*وتعس من جعل الوطن في عينيه أسرة صغيرة..*
*ونسي هموم ومعاناة ٱلاف البسطاء والمساكين..*
*من لا وجيع لهم.. ولا مُعين..*

*ومواكب..*
*ما بتتراجع تاني..*
*أقيف.. قداما..*
*وأقول.. للدنيا..*
*أنا سوداني..*

*وأنا سوداني..*

*#علي_جعفر*